5

Naglaglagto ni Armstrong iti rabaw ti bulan.
1 9 6 9
Naglaglagto met dagiti scientist ken engineer a nangiwanwan
iti spaceship a Rosetta a nagdisso iti cometa 67P/Churyumov-Gerasimenko
2 0 1 4
Iti umuna a daras, nagtayab iti tangatang ti maysa nga SpaceX rocket,
sa nagsubli ket nag-landing iti tumtumpaw a plataporma iti baybay.
2 0 1 6
Ti kuna ni Elon Musk, mangitulodton ti SpaceX iti tattao a mapan Mars.
2 0 2 5

Inton gumatangak iti tiket a mapan Mars isaganak
dagiti kankanta ti AC/DC, Linkin Park, Disturbed ken Sevendust.
Agik-ikkisakto agingga a makasangpetak
iti sabali a planeta.

4

Shorts. Pantalon. Brief. T-shirt. Long sleeves. Foundation series
ni Isaac Asimov. Medyas. Samra. Laptop. Kamera. Awan met signal
idiay Mars, ibatikon daytoy selpon.
Bolpen. Papel. Nalabit addanto koreo
iti nagbaetan ti lubong ken Mars. Tallogasut nga aldaw
ti lumabas sakbay a makadanon ti surat.

Kalendaryo. Kasano ngata a bilangen ti tunggal aldaw
nga aglabas? Yantangay ta at-atiddog ti panaglikaw
ti Mars iti Init.
Helmet. Space suit.
Iserra ti zipper. Idisso ti bag
iti maitutop a suli.

Agidda iti tugaw sa tangaden
ti agur-uray a tangatang.

3

Di kabaelan nga arakupen
ti lima a nakadippa a tattao
dagiti kaykayo idi
1 9 8 0
Ngem iti natapok a daldalan iti patag ti Mallig
nagadu ti napasag
a kayo ti almaciga, tanguile, narra, yakal, ken lauan.
Nakaiddada a simmalog
manipud Sierra Madre.

Naputed.
Naragadi.
Naikadena.
Naisiglot
kadagiti nagdadakkel a trak.

Nilikawda ngata ti lubong
tapno agbalin a paset dagiti natatakneng
a pasdek?
wenno muebles iti uneg
dagiti mansion?

Nabati dagiti ramutda kadagiti bambantay
agingga nga inyanod ti danum nga inyeg ti nadawel
a tudo ken bagyo.

2

Pumudpudot ti lubong.
In-inut a marunrunaw dagiti yelo
a nakaimassayagan ti pakasaritaan
daytoy lubongko nga ita
innakon libasan.

1

Sakbay a naglugan ni Noe ken ti pamiliana iti arko
maysa a pares ti tunggal kita ti ayup ti immuli,
nagdaliasat, ken naisalakan, manipud
didigra ti layus.

Awan kaparesko. Ngem gumatangakto
iti ticket a mapan Mars. Isaganak
dagiti kankanta ti AC/DC, Linkin Park, Disturbed ken Sevendust.
Agik-ikkisakto no mangrugi ti

LIFT OFF.